មន្ត្រីរដ្ឋបាលនៃសាលាខណ្ឌពោធិ៍សែនជ័យ ចោទ មន្ត្រីបរិស្ថាន ថា ជាអ្នកប្រមូលលុយ ពីអាជីវករលក់ដូរលើផ្លូវថ្នល់សាធារណៈ ផ្លូវជាតិលេខ៤

ស្ថិតនៅត្រង់ចំណុចមុខផ្សារជម្ពូវ័ន១ លើផ្លូវជាតិលេខ៤ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ កំពុងតែមានការកកស្ទះជារៀងរាល់ថ្ងៃ គ្មានសណ្តាប់ធ្នាប់ គ្មានអនាម័យ ដោយសារតែមានការបើកដៃពីអាជ្ញាធរ ឲ្យអាជីវករជិតឆ្ងាយធ្វើការដាក់តាំងសម្ភារៈលក់ដូរ លើផ្លូវថ្នល់ជាប្រចាំ។

ករណីនេះមន្ត្រីរដ្ឋបាលខណ្ឌពោធិ៍សែនជ័យ លោក ហុក សុទិត្យា បានប្រាប់សារព័ត៌មានយើងឲ្យដឹងថា៖ «បញ្ហាលក់ដូរដោយរលូនលើផ្លូវថ្នល់ទាំងនេះ គឺមន្ត្រីបរិស្ថានជាអ្នកដើរប្រមូលលុយជាប្រចាំថ្ងៃពីអាជីវករ ទាំងអស់នោះ រីឯមន្ត្រីខណ្ឌនិងប្រធានផ្សារមិនបានដើរប្រមូលយកលុយនោះទេ គឺ មន្ត្រីបរិស្ថានជាអ្នកប្រមូលយកលុយទាំងអស់នោះ»។

យ៉ាងណាការចោទប្រកាន់នេះ ប្រធានមន្ទីរបរិស្ថានរាជធានីភ្នំពេញ បំភ្លឺជាមួយអ្នកសារព័ត៌មានយើង និងបានធ្វើការបដិសេធ ដោយធ្វើការច្រានចោលទាំងស្រុង ចំពោះការចោទប្រកាន់ពីមន្ត្រីខណ្ឌពោធិ៍សែនជ័យ និងស្នើសុំឱ្យសារព័ត៌មានជួយសហការរកមុខជនណាដែលប្រមូលលុយពីអាជីវករលក់ដូរលើផ្លូវទាំងនោះ។

ភាពអនាធិបតេយ្យទាំងអស់នេះ លោកអភិបាលខណ្ឌពោធិ៍សែនជ័យ ក៏បានចេញសេចក្តីប្រកាសព័ត៌មានជូនដំណឹងទៅដល់អាជីវករទាំងអស់នោះឲ្យធ្វើការឈប់លក់ដូរលើផ្លូវ ដោយទុករយៈពេលមួយសប្តាហ៍!

ប៉ុន្តែគិតរហូតមកទល់ពេលនេះ សេចក្តីជូនដំណឹងប្រៀបបានដូចជាឯកសារឥតន័យ ឬត្រឹមតែជាក្រដាសខ្ចប់នំប៉័ងសាច់តែប៉ុណ្ណោះ ខណៈពេលនេះភាពអនាធិបតេយ្យនៅលើផ្លូវជាតិលេខ៤ នៅតែបន្តមានកំណើនជារៀងរាល់ថ្ងៃ៕