របាំងស្បៃ នេសាទខុសច្បាប់ កំពុងរីកដូចផ្សិត ទំនងបានជាផលប្រយោជន៍ ដល់មន្ត្រីជលផល ស្រុកស្អាង

មន្ត្រីជលផល ស្រុកស្អាង ខេត្តកណ្តាល ទំនងជាទទួលបានផលប្រយោជន៍ពីឈ្មោះ ធិន និងឈ្មោះ សេង ដែលជនទាំងពីរនាក់នេះ ជាម្ចាស់របាំងស្បៃឡូនេសាទខុសច្បាប់ និងជាស្តេចត្រាញ់ប្រចាំស្រុកស្អាង។

តាមប្រភពព័ត៌មាន៖ «ស្ថិតនៅចំនុចភូមិព្រែកគ្រួស ឃុំព្រែកអំបិល ស្រុកស្អាង ខេត្តកណ្តាល ត្រូវបានឈ្មោះ ធិន និងឈ្មោះ សេង គ្រប់គ្រងទាំងស្រុងលើផ្ទៃបឹងទន្លេ ដោយជនទាំងពីរនាក់នេះ បានបង្កើតរបាំងឡូនេសាទ បិទបាំងដោយស្បៃមុងក្រឡាញឹក បោះបង្គោលឬស្សីពាសពេញផ្ទៃបឹង ហ៊ុំព័ទ្ធជុំវិញតំបន់ ហ៊ុំព័ទ្ធជុំវិញបឹងទន្លេ ព័ទ្ធឡើងជិតជុំតែម្តង ធ្វើឲ្យត្រីតូចត្រីធំមិនអាចបំបន្លាស់ទី និងប៉ះពាល់យ៉ាងធ្ងន់ធ្ងរដល់បរិស្ថាន ហើយបញ្ហានេះក៏គ្មានមន្ត្រីជំនាញជលផល នៃរដ្ឋបាលជលផលណាម្នាក់ហ៊ានអើតមុខចេញមើលនោះទេ»។

ករណីខាងលើនេះធ្វើឲ្យមហាជនជាច្រើន យល់ឃើញថា មន្ត្រីរដ្ឋបាលជលផល ស្រុកស្អាង ខេត្តកណ្តាល រួមទាំងអភិបាលស្រុកស្អាង លោក ជឺ គឹមហៃ ទំនងជាចូលដៃចូលជើងជាមួយនឹងឈ្មោះ ធិន និងឈ្មោះ សេង ទើបមិនដែលឃើញដឹកនាំកម្លាំងសមត្ថកិច្ចខ្លួនចុះបង្ក្រាប។

ប្រជាពលរដ្ឋសូមសំណូមពរដល់រដ្ឋបាលខេត្តកណ្តាល ឯកឧត្តម គួច ចំរើន អភិបាលខេត្ត និងស្នើសុំដល់ឯកឧត្តម ឌិត ទីណា រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ សូមជួយចាត់វិធានការទប់ស្កាត់បទល្មើសនេសាទខុសច្បាប់ក្នុងភូមិសាស្ត្រស្រុកស្អាង ខេត្តកណ្តាលផងទាន៕