ទីតាំងបូមខ្សាច់ គ្មានច្បាប់ទម្លាប់ លក្ខណៈទ្រង់ទ្រាយធំ ខណៈអាជ្ញាធរខេត្តកំពង់ឆ្នាំង កំពុងតែរក្សាភាពស្ងៀមស្ងាត់

អាជ្ញាធរនិងមន្ត្រីជំនាញពាក់ព័ន្ធ ក្នុងខេត្តកំពង់ឆ្នាំង កំពុងតែចូលរួមយ៉ាងសកម្ម ក្នុងការរក្សាភាពស្ងៀមស្ងាត់ ខណៈទីតាំងបូមខ្សាច់ គ្មានច្បាប់ទម្លាប់ ជាលក្ខណៈទ្រង់ទ្រាយធំមួយកន្លែង នៅតែអាចបន្តជីកឃួងបូមខ្សាច់បានដោយរលូន និងមិនខ្វាយខ្វល់ពីបញ្ហាបាក់ស្រុតដីនាថ្ងៃខាងមុខ។

តាមប្រភពព័ត៌មានបានឲ្យដឹងថា៖ ទីកន្លែងបូមខ្សាច់ គ្មានច្បាប់ គឺស្ថិតនៅភូមិអូរលេងតេង ឃុំក្រាំងស្គារ ស្រុកទឹកផុស ខេត្តកំពង់ឆ្នាំង ហើយទីតាំងនេះបូមខ្សាច់យកទៅខេត្តព្រះសីហនុ ដោយដឹកជញ្ជូនតាមរយៈរថភ្លើង ក្នុង១ថ្ងៃៗរាប់ពាន់ម៉ែត្រគូប បន្ទាប់ទៀតដឹកជញ្ជូនតាមកប៉ាល់បន្តទៅក្រៅប្រទេស។

ប្រភពព័ត៌មានបានបញ្ជាក់ទៀតដែរថា៖ ទីតាំងមួយនេះកន្លងមកធ្លាប់បានមន្ត្រីជំនាញចុះធ្វើកិច្ចសន្យាជារើយៗផងដែរ ប៉ុន្តែកិច្ចសន្យានោះត្រូវគេសង្ស័យថាជាកិច្ចសន្យាខ្យល់តែប៉ុណ្ណោះ ហើយក៏ជាកិច្ចសន្យាដោះទាល់មួយគ្រាៗ ចំពោះផ្លូវច្បាប់សាបដូចទឹកអណ្ដូង។

ករណីជីកខួងអណ្ដូងបូមយករ៉ែខ្សាច់ ចេញពីក្រោមដី ដោយអនាធិបតេយ្យនេះ ធ្វើឲ្យពលរដ្ឋសម្តែងក្តីព្រួយបារម្ភយ៉ាងខ្លាំង ចំពោះបញ្ហាបាក់ស្រុតដី នាពេលអនាគតដោយយថាហេតុ។

ប្រជាពលរដ្ឋជាច្រើនសូមអំពាវនាវដល់លោក ស៊ុន សុវណ្ណរិទ្ធ អភិបាលខេត្តកំពង់ឆ្នាំង រួមទាំងអស់លោកលោកស្រី ដែលជាប្រធានមន្ទីរពាក់ព័ន្ធ សូមចាត់វិធានការទប់ស្កាត់ចំពោះករណីនេះផង ជៀសវាងការបាក់ស្រុតដីជាយថាហេតុនាថ្ងៃខាងមុខ៕