ស្ងាត់ទែនមែន! ករណីមន្ត្រីផ្កាយ១ កាប់ប្រជាពលរដ្ឋ ដែលជាគូរទំនាស់បណ្តាលឲ្យរបួស ២នាក់ យ៉ាងធ្ងន់ធ្ងរ នៅក្រុងអរិយក្សត្រ ខេត្តកណ្តាល

មន្ត្រីនគរបាលផ្កាយ១ នៃក្រសួងមហាផ្ទៃ សុខ ស៊ីថា រួមទាំងបក្សពួកជាច្រើន បានព្រួតគ្នាវាយកាប់ប្រជាពលរដ្ឋ ដែលជាគូរទំនាស់ក្នុងវិវាទព្រំដី ស្ថិតនៅក្រុងអរិយក្សត្រ ខេត្តកណ្តាល បន្ទាប់មកក៏រត់គេចខ្លួនបាត់ស្រមោលពេលនេះហាក់ដូចជាស្ងាត់ជ្រងំតែម្តង។

បន្ទាប់ពីកើតហេតុភ្លាមៗកាលពីថ្ងៃទី១៧ វិច្ឆិកា ឆ្នាំ២០២៥ កម្លាំងសមត្ថកិច្ចនគរបាលនៃស្នងការដ្ឋានខេត្តកណ្តាល បានឃាត់ខ្លួនជនដៃដល់បានភ្លាមៗចំនួន៤នាក់ ក្នុងចំណោមជនដៃដល់៥នាក់ ពាក់ព័ន្ធការប្រើអំពើហិង្សាដោយចេតនាបណ្តាលឲ្យជនរងគ្រោះចំនួនពីរនាក់ របួសដេកពេទ្យយ៉ាងឈឺចាប់។

យ៉ាងណាករណីនេះ សមត្ថកិច្ចបានកសាងសំណុំរឿងបញ្ជូនខ្លួនជនដៃដល់ចំនួន៤នាក់ ទៅកាន់តុលាការ ដើម្បីចាត់ការបន្តតាមនីតិវិធីច្បាប់។

ចំណែកឯជនដៃដល់ ម្នាក់ទៀត ដែលជាមន្ត្រីនគរបាលផ្កាយ១ ឈ្មោះ សុខ ស៊ីថា កំពុងបន្តដើរហើរយ៉ាងរំភើយផោយផាត់ ហាក់កំពុងតែស្ងប់ស្ងាត់ទែនមែន! ពោលគឺ៖ គ្មានខ្វល់អំពីបញ្ហាផ្លូវច្បាប់បន្តិចនោះទេ។

ទាក់ទិនទៅនិងជនដៃដល់ម្នាក់ ដែលជាមន្ត្រីផ្កាយ១ បានរត់គេចខ្លួននោះ អ្នកនាំពាក្យនៃស្នងការដ្ឋាននគរបាលខេត្តកណ្តាល បានប្រកាសព័ត៌មាន ថា កម្លាំងសមត្ថកិច្ចជំនាញកំពុងបន្តស្រាវជ្រាវស្វែងរក ប៉ុន្តែគិតរហូតមកទល់ពេលនេះនៅមិនទាន់រកឃើញនៅឡើយនោះទេ។

ករណីខាងលើនេះមហាជនជាច្រើនបានលើកឡើងទាំងរវើរវាយដូចអ្នកស្រវឹងស្រាកណ្តាលថ្ងៃថា «ជនដៃដល់ផ្កាយ១ពាក់ស័ក្តិលើស្មាសងខាងរូបនេះ ទំនងជារត់ឡើងយន្តហោះលំដាប់ VIP ហោះហើរទៅនៅប្រទេសក្រៅបាត់ហើយមើលទៅ ទើបរកមិនឃើញ»៕

អត្ថបទ៖ ម្ចាស់ជំរុំ អក្សរ ន៚